7. అలంకారపు కుట్లు
1. రన్నింగ్ ( Running ) :---
దీనికి పైన క్రింద కూడ సిల్క్ దారాన్ని ఉపయోగించవలెను. ఫ్రెషర్ ఫుట్ ని తీసివేసి ఫ్రేమ్ ను బట్ట యొక్క వెనక వైపున బిగించవలెను. డిజైనును బట్ట నునుపు వైపు వేసి అది సూదికిందకు తెచ్చి ఫ్రెషర్ బార్ ను కిందకు దించవలెను.బాబిన్ దారము పైకి తెచ్చుకోవలెను. డిజైను ననుసరించి మామూలు మిషను కుట్టు కుట్టునట్లే కుట్టవలెను. ఈ రన్నింగ్ కుట్టుతో పువ్వులు , ఆకులు ,కొమ్మల మధ్య భాగాన్ని పూరించవచ్చు. ఈ ఎంబ్రాయిడరీ ఏ విధమైన బట్టపైన అయిన చేయవచ్చును.
2. కార్డింగ్ ( Carding ):—
డిజైనును తిన్ననివైపు వేసి ఫ్రేమ్ బట్ట వెనుకవైపున బిగించవలెను. బట్ట అప్పుడు వెనుకకు తిప్పిన నునుపు వైపు అగును. డిజైను భాగమును ఫ్రెషర్ బార్ కిందకు జరిపి , ఫ్రెషర్ బార్ ను కిందకు దించవలెను. బాబిన్ దారం పైకి తెచ్చుకోవలెను. డిజైను అవుట్ లైను ను మామూలు రన్నింగ్
కుట్టుతో కుట్టి , దాని మీద ఫ్రేమ్ ను అటు ఇటు కదుపుతూ కార్డింగ్ కుట్టు కుట్టవలెను. ఈ ఎంబ్రాయిడరీ గుడ్డ కంటే కాస్త ఎత్తుగా కనబడి డిజైను బాగుగా కనబడునట్లు చేయును. దీనికి పైన కింద సిల్క్ దారమును , లేదా పైన సిల్క్ దారము , బాబిన్ నందు నూలు దారమును ఉపయోగించి కూడ చేయవచ్చును. ఇది అన్ని రకములైన వస్త్రములపైన చేయవచ్చును. ఇదే కార్డింగ్ కుట్టు ఎప్లిక్ ( Applique work ) పనిచేయునప్పుడు , నెట్ వర్క్( Net work ) చేయునప్పుడు, ఐలెట్ పని ( Eyelet work ) మరియు కాటన్ పని ( Cotton work ) చేయునప్పుడు ఎక్కువ ఉపయోగపడును.
3. రవుండ్ స్టిచ్ ( Round stitch ):--- ఈ
ఎంబ్రాయిడరీకి సాధారణంగా లావు దారం సూదికి , సన్నటి దారం బాబిన్ లోను ఉంచి చేయవలెను. కింది టెన్షన్ ను వదులుచేసి పై టెన్షన్ ను బిగించ వలెను. ఫ్రెషర్ ఫుట్ ను తీసివేయవలెను. డిజైనును బట్టకు నునుపువైపు వేయవలెను. ఫ్రేమ్ బిగించిన తరువాత ఫ్రెషర్ బార్ ను పైకి ఎత్తి ఫ్రెషర్ బార్ కింద డిజైనుగల భాగమును తేవలెను. బాబిన్ దారమును కూడ ఒక కుట్టుకుట్టి పైకి తెచ్చుకోవలెను. డిజైనును అనుసరించి కుట్టు గుండ్రముగా ఫ్రేమును తిప్పుతూ కుట్టవలెను. ఈ కుట్టు చిన్న చిన్న చక్రాలవలె అందముగా కనపడును.
స్కాలోపింగ్ (Scalloping ) :---
ఈ ఎంబ్రాయిడరీని కార్డింగ్ తో చేయవలెను. ఇది టెబుల్ క్లాత్ అంచులకు , చీర అంచులకు వాడుదురు. ఇది చివర అంచులందు దారాలు ఊడిపోకుండా చేయుటయే కాక అంచుకు ఒక అందాన్ని ఇచ్చును. సన్నటి దారము పైన కింద కూడ వేసి చేయవలెను. లేదా కుట్టు గట్టిగా ఎత్తుగా కనపడవలెనంటే పైన సిల్క్ కింద నూలు దారాన్ని వాడవలెను.ఇది ఒక డిజైనులో వేసిన తరువాత ఆ డిజైను ననుసరించి బట్టను కత్తిరించవలెను. ఇది వేసిన పిదప దీనికి మీద పువ్వులు , ఇతర ఎంబ్రాయిడరీలైన చేయవచ్చును. అంచులు ఆర్చెస్ వలే కనబడును.
5. సాటిన్ స్టిచ్ (Satin stitch ) :--
ఈ కుట్టు బాగా కుదరవలెనంటే బాబిన్ లోను సూదికి కూడా లావు దారము వేసి కుట్టవలెను. చేతితో ముద్ద కుట్టు ఏ విధంగా కుడతామో అదే విధంగా మిషను మీద సాటిన్ కుట్టు కుట్టవలెను. దీనిలో కుట్టు దగ్గర దగ్గర గా ఉండి వత్తుగా , అందముగా కనబడును. డిజైను గల భాగము గుడ్డకన్నా ఎత్తుగా కనబడును. ఈ కుట్టు కుట్టుటకు ముందు రన్నింగ్ కుట్టు కుట్టవచ్చును.
6. ఎప్లిక్ వర్క్ ( Applique work) :---
ఎప్లిక్ కుట్టు పనికి సొంపును కూర్చు కళ. మామూలు ఎంబ్రాయిడరీ కంటే తక్కువ కాలములో పెద్ద పెద్ద రంగులతో కూడిన నమూనాలను తయారు చేయవచ్చును. మనకు కావలసిన అనేక ఆకారములలో గుడ్డను కత్తిరించి ఈ ముక్కలను నేర్పుతో వేరొక బట్ట పై కుట్టవలెను. ప్రస్తుతం ఈ కళను బజారు సంచులు, టేబులు క్లాతులు , తెరలు కుషను కవర్లు మొదలగు వాటిని అందంగా తయారు చేయుటకు ఉపయోగించుచున్నారు. నూలు బట్టలు, ఉన్ని బట్టలు, సిల్క్ బట్టలు మొదలగునవన్నియు ఇందుకు ఉపయోగించ వచ్చును. పుష్పములు, ఆకులు , జంతువులు , కొమ్మలు ఏఏ భాగములకు సరిపడు బట్టను ఆయా భాగములకు తీసుకొని దానిని ముందుగా ఇస్త్రీ చేయవలెను. తరువాత నమూనాను కత్తిరించవలెను. నమూనా అంచులను కూడ మడవ వలెనన్న అక్కడక్కడ కత్తెరతో గాట్లు పెట్టి వెనుకకు మడిచి ఇస్త్రీ చేయవలెను. జిగ్ జాగ్ మిషను నందు కుట్టుటకు మడవ నక్కరలేదు.
ఆ మిషను నందు దానికదే మడత పడుతూ కుట్టుటకు ఏర్పాటు కలదు .ఈ విధంగా మడతపెట్టిన నమూనాలను టాకా కుట్టుతో కుట్టి తరువాత దానిని అలాగే ఎంబ్రాయిడరీ చేయవలసిన బట్టపై నునుపు వైపు పెట్టి మొదట రెండింటిని కలిపి టాకా వేయవలెను. తరువాత దానిమీద కార్డింగ్ చేయవలెను. చేతితో చేయు ఎప్లిక్ కి మిషను మీద చేయు ఎప్లిక్ కు తేడా ఈ కుట్టునందే కలదు. చేతితో చేయునప్పుడు చుట్టూ బ్లాంకెట్ స్టిచ్ చేయాలి. మిషను నందు కార్డింగ్ చేయాలి. గుడ్డ యొక్క నిలువు అడ్డములు , దానిపై అతుకు నమూనా యొక్క నిలువు అడ్డముల ననుసరించి యుండవలెను. లేనిచో ఎప్లిక్ కుట్టునప్పుడు ముడతలు పడగలవు.
ఈ ఎప్లిక్ నమూనాను కత్తిరించకుండా కూడ కుట్టవచ్చును.
దీనికై ముందుగా డిజైను ట్రేస్ చేయవలెను. తరువాత ఆగుడ్డను ఎప్లిక్ చేయవలసిన గుడ్డపై నునుపు వైపు పెట్టి చుట్టూ టాకా వేయవలెను. తరువాత డిజైనును అనుసరించి రన్నింగ్ చేయవలెను. రన్నింగ్ చేసిన తరువాత రన్నింగ్ చుట్టూ ఎక్కువగా నున్న బట్టను రన్నింగ్ వెంబడి కత్తిరించి వేయవలెను. తరువాత ఈ రన్నింగ్ మీద కార్డింగ్ చేయవలెను. మిషను మీద చేయు ఎప్లిక్ పని త్వరగా అగుటయే కాక చేతితో చేసిన దానికన్నను చక్కగా కనబడును. దీనికై డిజైను ననుసరించి వివిధరంగులు వాడవలెను. ఉదాహరణకి పువ్వులు ఆకులు ఉన్నయెడల ఎరుపు రంగు ఆకుపచ్చ రంగు కొమ్మలున్నయెడల మట్టిరంగు (Brown ) వాడవలెను. ఈ విధంగా రకరకాల రంగులు ఉపయోగించి బట్టకు ఎంతో సొంపును తేవచ్చును.
7. నెట్ పని ( Net work ) :---
దీనికై నెట్ లేదా వలగుడ్డను ఉపయోగించవలెను. ఈ వల గుడ్డ పెట్టి కుట్టవలసిన గుడ్డ వెనుకవైపున వలగుడ్డ పెట్టి టాకా వేయవలెను. ముందునున్న గుడ్డ పై డిజైనును గీసి డిజైను వెంబడి రన్నింగ్ చేయవలెను. ఆ రన్నింగ్ వెంబడి కార్డింగ్ చేయవలెను. తరువాత పైన ఉన్న గుడ్డను డిజైనును అనుసరించి లోపలివైపు కత్తిరించవలెను. అప్పుడు కార్డింగ్ చేసిన వలగుడ్డ మాత్రము కనబడును. ఇది కూడ గుడ్డకు ఒక అందము నిచ్చును.
8. ఐలెట్ కుట్టు (Eyelet work ) :----
మొదట డిజైనును నునుపు వైపు ట్రేస్ చేయవలెను. ఫ్రెషర్ బార్ కిందకు డిజైనును జరిపి చుట్టు రన్నింగ్ చేయవలెను. తరువాత రన్నింగ్ వెంబడి కార్డింగ్ చేయవలెను.
కార్డింగ్ చేయుటకు ముందు డిజైను మధ్యలో ఖాళీ ఏర్పడి కన్ను ఆకారములో కనబడును.
ఇదే కన్ను ఆకారము పెద్ద సైజు చేయవలసి వచ్చినప్పుడు డిజైను యొక్క ఆకారము చెడిపోకుండా ఆ డిజైను మధ్యలో కూడా సన్నగా కార్డింగ్ చేయవలెను. ఈ మధ్యలో ఉన్న కార్డింగ్ డిజైను యొక్క రెండుచివరలను కలిపి ఉంచుతుంది.
ఆకారాన్ని చెడగొట్టదు. పెద్ద పెద్ద పువ్వులు మొదలగునవి చేసినప్పుడు కూడా మధ్యమధ్యలో ఇలా కార్డింగ్ చేయవలెను. మధ్యలో చేసిన కార్డింగ్ వదలి ఈ వైపు ఆ వైపు నున్న గుడ్డను కత్తిరించవలెను.
9. లాంగ్ అండ్ షార్ట్ ( Long and short ) :---
డిజైనును బట్ట నునుపు వైపు వేసి వెనుక వైపు ఫ్రేమ్ ను బిగించవలెను. తరువాత డిజైనును ఫ్రెషర్ బార్ కిందికి తీసుకొచ్చి ఫ్రెషర్ బార్ ను కిందకి దించి ఎంబ్రాయిడరీ చేయుటకు ప్రారంభించవలెను. బాబిన్ లోని దారాన్ని కూడా పైకి తెచ్చుకోవలెను. దీనికి పైన , కింద కూడ సిల్క్ దారాన్ని ఉపయోగించవలెను. షేడెడ్ దారమైతే మరింత అందముగా ఉండును. ఇది సాటిన్ స్టిచ్ వలె కుట్టవలెను. కాని సాటిన్ స్టిచ్ లో వలె అన్ని కుట్లు సమానముగా ఒకే మోస్తరుగా ఉండవు. డిజైన్ పూరించుటలో కొన్ని పొడవు కుట్లను కొన్ని పొట్టి కుట్లను ఒక వరుస తరువాత మరియొక వరుస ప్రక్క ప్రక్కన వేయవలెను. ఒక పొట్టి కుట్టు , ఒక పొడవు కుట్టు తో ఈ కుట్టు కూడ చూచుటకు అందముగా ఉండును. ఈ కుట్టుతో ఆకులు, పువ్వులు , మొగ్గలు అన్ని కుట్టవచ్చును. రెండు రకములయిన కుట్లకలయిక కనుక లాంగ్ అండ్ షార్ట్ అని పేరొచ్చినది.
10. కాటన్ వర్క్ ( Cotton work):--- ఈ కాటన్ వర్క్ చేయుటకు బేండేజ్ కాటన్ వాడవలెను. అది పొరలు పొరలు గా చుట్టబడి వుండును. కనుక దాన్ని గుడ్డపైన పరవడం తేలిక మరియు అన్ని వైపుల సమానముగా ఉండును. మనకు కావలసిన డిజైనును ఒక పేపరు పై వేసుకో వలెను. గుడ్డపై నునుపు భాగమున కాటన్ ఒక పొర పరిచి దానిపై ఈ డిజైన్ కాగితమును వుంచి డిజైన్ చుట్టు రన్నింగ్ చేయవలెను. డిజైన్ అవుట్ లైన్ రన్నింగ్ చేసిన తరువాత మెల్లగ కాగితమును చింపి వేయవలెను. రన్నింగ్ కుట్టు ఉన్నందున కాటన్ బట్టకు అతకబడి ఉండును. డిజైన్ పేపర్ చింపివేసిన తరువాత రన్నింగ్ వెంబడి కార్డింగ్ చేయవలెను. తరువాత మధ్యలో ఏవైన భాగాలున్న అవి రన్నింగ్ తో గాని కార్డింగ్ తో గాని కుట్టవలెను. ఈ కాటన్ తో కుందేలు, కుక్క , ఏనుగు మొదలైన బొమ్మలు కూడ కుట్ట వచ్చును. వాటి కండ్లు మొదలగునవి పూసలు గాని చెమ్కీలు గాని కుట్టి పూర్తి చేయవలెను. దీనికి పైన కింద సిల్క్ దారాన్ని వాడవలెను. పైన సిల్క్ , కింద కాటన్ కూడ వాడవచ్చును.
ఈ మిషను ఎంబ్రాయిడరీ
లన్నీ కూడ మిషను నెమ్మదిగా తొక్కుతూ ఫ్రేమ్ ను మిషను కదలికతో పాటు నెమ్మదిగా కదుపుతూ చేయవలెను. ఏ మాత్రము తేడా వచ్చినా దారం తెగిపోవడం జరుగుతుంది. తరువాత టెన్షన్ సరిచేసుకుంటు కుట్టవలెను. ముందుగా వ్రాసిన జాగ్రత్తలు చదువుకుని వాటిని పాటించుతు మిషను ఎంబ్రాయిడరీని చేయవలెను.
సూదితో ఎంబ్రాయిడరీ చేయుట:—
(Embroidery with needle )
బట్టపై నురగవైపు నమూనాను గీసుకొని ఫ్రేమ్ ను బిగించవలెను. ప్రెషర్ బార్ ని పైకి ఎత్తి నమూనాను సూది కిందకి జరిపి కుట్టుపని సాగించవలెను.
ఒక పెద్ద సూదిని తీసుకొని నమూనాపై పెట్టి సూదికిటు అటు కార్డింగ్ చేయవలెను. అలా సూదిని జరుపుకుంటూ కార్డింగ్ చేయవలెను. కార్డింగ్ చేయడం పూర్తి అయిన తరువాత సూదిని తీసివేయవలెను. సూదిని పెట్టి చేయడం వలన ఈ కార్డింగ్ ఎత్తుగా కనబడును. దీనితో పువ్వులు , ఆకులు , కొమ్మలు, మొగ్గలు అన్నియు ఎంబ్రాయిడరీ చేయవచ్చును. కుట్టు సరిగ్గా సూదికి ఈ ప్రక్క ఆ ప్రక్క పడవలెను. ఏ మాత్రము తేడా వచ్చిన రెండు సూదులు ఒకదాని కొక్కటి తగిలి మిషను సూది విరిగిపోవును.
-----------------------------------------------------
2. ట్వయిన్ దారముతో ఎంబ్రాయిడరీ చేయుట ( Twine work ) :---
బట్ట పై నురగ వైపు నమూనాను గీసుకుని ఫ్రేమ్ ను బిగించవలెను. ప్రెషర్ బార్ ను పైకి ఎత్తి సూది కిందకు ఫ్రేమును జరిపి డిజైను వెంబడి ట్వయిన్ దారాన్ని పెట్టి ఇటు అటు కార్డింగ్ చేయవలెను. ఈ విధంగా చేయుట వలన కార్డింగ్ చేసిన భాగము ఎత్తుగా కనపడును. కుట్టు సమానముగా వచ్చును.
-----------------------------------------------------
3. కార్డింగ్ ( Carding ) :---
డిజైను గీతల వెంబడి ముందు రన్నింగ్ కుట్టు కుట్టి తరువాత ఆ కుట్టు కిటు అటు సూదిని కదుపుతూ కార్డింగ్ కుట్టు కుట్టవలెను. ఇది కొమ్మలకు ఆకులకు వాడిన అందముగా కనబడును. ఎప్లిక్ , ఐలెట్ , కట్ వర్క్ మొదలగు ఇతర కుట్లు కుట్టడానికి కార్డింగ్ కుట్టు ప్రధానమైనది.
---------------------------------------------------4. కట్ ఎంబ్రాయిడరీ (Cut work ) :-- డిజైను గుడ్డ పై వేసుకున్న తరువాత ఫ్రేమును బిగించి ప్రెషర్ బార్ ను పైకెత్తి సూది కిందకు వచ్చునట్లుగా జరిపి నమూనా వెంబడి కార్డింగ్ చేయవలెను. కార్డింగ్ పూర్తిగా చేసిన తరువాత నమూనా లోపలి వైపు కత్తిరించవలెను. లేదా మొదట నమూనా లోపల కత్తిరించిన తరువాత అంచు వెంబడి కార్డింగ్ చేయవలెను. ఈ విధంగా రెండు రకాలుగా కూడా చేయవచ్చును. డిజైను పెద్దగా ఉన్న యెడల మధ్యభాగము కత్తిరించునప్పుడు ఆకారము చెడిపోయే అవకాశము కలదు. కనుక నమూనా మధ్యలో కూడా అక్కడక్కడ కార్డింగ్ చేయవలెను.
ఈ ఎంబ్రాయిడరీ కత్తిరించి చేయుట వలన కట్ ఎంబ్రాయిడరీ అని పేరు వచ్చింది.
No comments:
Post a Comment